22 İyul Milli Mətbuat və Jurnalistika Günü
|
17.7.2024
|
|
17 iyul 2024-cü il tarixdə M.S.Ordubadi adına Naxçıvan Muxtar Respublika Kitabxanasında “22 İyul - Milli Mətbuat və Jurnalistika Günü” adlı sərgi təşkil edilmişdir. Sərgidə 32 kitab nümayiş edilmişdir.
A. Aşırlının qələmə aldığı “Azərbaycan mətbuat tarixi (1875-1920)” kitabı müasir Azərbaycan jurnalistikasının bünövrədaşı olan mətbuatımızın tarixi tədqiqinə həsr edilmişdir. “Əkinçi” (1875-1877) kitabında milli mətbuatımızın təməli sayılan “Əkinçi” qəzetinin XIX əsrdə Azərbaycanın ictimai-siyasi həyatındakı rolundan bəhs edilmiş, qəzetdə yer alan məktubların, məqalələrin, xəbərlərin tam mətni verilmişdir. “Şərq qapısı” qəzetinin 100 illik yubileyinin qeyd olunması münasibətilə nəşr olunmuş “Şərq qapısı” qəzetinin nəşri tarixi və inkişaf yolu” kitabında qəzetin maarifin, elmin, ictimai fikrin inkişafına verdiyi töhfələrdən, muxtar respublikada jurnalistikanın inkişafından, cəmiyyətin informasiyaya olan tələbatının ödənilməsindəki mühüm rolundan bəhs edən məqalələr toplanmışdır. 10 cilddən ibarət olan “Molla Nəsrəddin” satirik jurnalının ilk 3 cildində C.Məmmədquluzadə tərəfindən yaradılan jurnalın çətin və şərəfli yolundan söz açılmış, 1906-cı ildən başlanaraq jurnalda dərc olunan felyeton, satira və s. materiallar ardıcıllıqla verilmişdir. Z.Kərimovun “XX əsrin əvvəllərində Şimali Azərbaycanda ictimai-siyasi vəziyyət mətbuat səhifələrində” adlı monoqrafiyasında Azərbaycanın milli intibahında mətbuatın üzərinə düşən vəzifələr, eləcədə Azərbaycan milli dövlətçiliyinin yenidən bərpasında mətbuatın rolu məsələləri tədqiq olunmuş, o dövrdə nəşr olunan müxtəlif qəzet və jurnalların, tanınmış qələm sahiblərinin maarifçi baxışları və fəaliyyət istiqamətləri ətraflı şəkildə təhlil olunmuşdur. A.Tahirlinin “Azərbaycan mühacirət mətbuatı” kitabına Azərbaycan mühacirlərinin dünyanın müxtəlif şəhərlərində çap etdirdikləri nəşrlər, qəzet və jurnal materialları, onların tarixi, mövzusu, ideya istiqaməti, dərc olunmuş materialların dil-üslub, sənətkarlıq xüsusiyyətləri haqqında yazılmış məqalələr daxil edilmişdir. Milli Mətbuatımızın 145 illiyinə həsr edilmiş M. Məmmədovanın “Naxçıvanın publisistik xəritəsi” kitabında Naxçıvanın inkişafı, tərəqqisi, qədimliyi ilə müasirliyinin vəhdəti, füsnkar diyarın bənzərsiz təbiət gözəllikləri publisistik janrda təqdim edilmişdir. “Naxçıvan dünya mətbuatında” kitabında bir çox xarici ölkələrin mətbuatında Naxçıvanın tarixi abidələri, dini ocaqları, istirahət guşələri və mədəni həyatı haqqında dərc olunan məlumatlardan və Naxçıvana gələn xarici qonaqların Naxçıvan haqqında təəssüratlarından bəhs edilmişdir.
Sərgidə həmçinin A.Məmmədlinin “Mollanəsrəddinçilik və milli ideya”, “Həsən bəy Zərdabi xatirələrdə”, “Jurnalist əməyi qeyri-adi əməkdir”, “Muxtar Respublika mətbuatı: dünən və bu gün”, H.Əliyevin “Qobustan” radiosu mətbuat aynasında”, “Yeni Füyuzat” jurnalı”, R.Gülgünün “Xəbərin rəngi” və digər milli mətbuatımızın tarixini əks etdirən kitablar yer almışdır. Sərgi iyul ayının 29-dək nümayiş ediləcək.
|
|