|
"20 Yanvar"
|
|
16.1.2025
|
|
16 yanvar 2025-ci il tarixdə Məmməd Səid Ordubadi adına Naxçıvan Muxtar Respublika Kitabxanasında 20 Yanvar - Ümumxalq Hüzn Günü ilə əlaqədar "20 Yanvar" adlı sərgi təşkil edilmişdir. Sərgidə Azərbaycanın müstəqilliyi, suverenliyi və ərazi bütövlüyü uğrunda ümumxalq mübarizəsində öz canlarından keçmiş oğul və qızlarımızın həyatına həsr edilmiş Azərbaycan və xarici dillərdə kitablar nümayiş edilir.
"Azərbaycan Respublikası Xatirə Kitabı"nın II cildində Böyük Vətən Müharibəsi cəbhələrində, Qarabağ döyüşlərində həyatını qurban vermiş əsgər və zabitlərimizlə yanaşı, 14 nəfər 20 Yanvar şəhidi haqqında da məlumat verilir. "Şəhidlər" adlı biblioqrafik vəsaitdə vətənimizin müstəqilliyi, suverenliyi və torpaqlarımızın bütövlüyü uğrunda həyatlarını qurban vermiş 20 Yanvar, Xocalı və Qarabağ şəhidləri haqqında kitablarda, dövri mətbuat səhifələrində dərc olunmuş materiallar toplanmışdır. Hidayət və V. Həbiboğlunun tərtib etdiyi "Şahidlər" kitabına 20 Yanvar faciəsini öz gözləri ilə gördüklərini qələmə almış çağdaşlarımızın yazıları daxil edilmişdir. V. Hümbətovun "Azərbaycan bəstəkarlarının yaradıcılığında tarixi mövzulu xor əsərləri" kitabında Azərbaycan bəstəkarlarının 1990-2000-ci illərdə yazdığı 20 Yanvar, Xocalı faciəsi, tarixi şəxsiyyətlər və qəhrəmanlıq mövzusuna həsr olunmuş əsərlər öz əksini tapmışdır. Q. Kəngərlinin "Qara yanvar şəhidləri" adlı sorğu kitabında 1990-cı ilin yanvar ayında Bakıda, Lənkəranda, Neftçalada, Gəncədə, Sədərəkdə Azərbaycanın azadlığı və suverenliyi uğrunda həlak olmuş şəhidlər haqqında qısa məlumatlar toplanmışdır. M. Səxavətqızının "Vətən fədailəri. Naxçıvan şəhidləri" adlı kitabının I hissəsində 1990-cı il 20 yanvar hadisələri zamanı Bakıda və Naxçıvanın Sədərək rayonunda gedən döyüşlərdə şəhid olmuş qəhrəman oğulların həyatı və onların igidliyinə həsr edilmiş şeirlər yer almışdır. E. Yurdoğlunun "İki şəhid, iki zirvə” adlı kitabında 90-cı illərdə Naxçıvan Muxtar Respublikasına qarşı mənfur ermənilərin silahlı hücumları zamanı vətənin müdafiəsində şəhid olmuş Kəngərli rayonu Yurdçu kəndindən olan 2 şəhid Müşfiq Qasım oğlu Səfərov və Kamran Cəbi oğlu Məmmədov haqqında ətraflı məlumat verilmişdir.
Bundan başqa sərgidə S.Yaqublunun "Sevgim dənizdir", B.Budaqovun "Vətən yanğısı", Ş.Qəmxarın "Ulduzlara gedən yol", V.Məmmədovun "Sədərəkdə yazılan gündəlik" və s. kitablar da nümayiş edilir. Sərgi 30 yanvar 2025-ci il tarixədək nümayiş ediləcək.
|
|