|
Yubiley tədbiri keçirilib
|
|
19.8.2025
|
|
19 avqust 2025-ci il tarixdə Məmməd Səid Ordubadi adına Naxçıvan Muxtar Respublika Kitabxanasında Xalq şairi Fikrət Qocanın anadan olmasının 90 illik yubileyi münasibətilə tədbir keçirilib.
Tədbiri giriş sözü ilə Məmməd Səid Ordubadi adına Naxçıvan Muxtar Respublika Kitabxanasının elmi işlər üzrə direktor müavini Yeganə Səfərova açaraq qeyd edib ki, Fikrət Qoca müasir poeziyamızın görkəmli simalarından biridir. Mənəvi ucalığa və mənalı yaşamağa səsləyən, insan və zaman haqqında lirik-fəlsəfi ümumiləşdirmələrlə zəngin əsərləri Fikrət Qocanı geniş oxucu kütləsinə sevdirib. Xalqımızın azadlıq mübarizəsindən bəhs edən əsərləri gənc nəslin vətənpərvərlik ruhunun tərbiyəsində əhəmiyyətli rol oynayır. Bu gün şairin sözlərinə bəstələnmiş mahnılar tanınmış müğənnilərin repertuarında geniş yer tutur.
Məmməd Səid Ordubadi adına Naxçıvan Muxtar Respublika Kitabxanasının Komplektləşdirmə şöbəsinin müdiri Rahilə Məmmədova “Poeziyamızın işığı – Fikrət Qoca” və böyük kitabxanaçı Gülan Səfərova “Ədibin poeziyasında lirika, vətənpərvərlik və azərbaycançılıq” adlı mövzularla çıxış edərək bildiriblər ki, F. Qoca müasir şeirimizin qüdrətli yaradıcılarındandır. F. Qoca Azərbaycan Radio və Televiziya Verilişləri Komitəsində, “Azərbaycan gəncləri” qəzetində, “Azərbaycan” jurnalında fəaliyyət göstərib, Azərbaycan Yazıçılar Birliyində beynəlxalq əlaqələr üzrə məsul katib olub. Çap etdirdiyi şeir kitablarında vətənə məhəbbət, vətənpərvərlik duyğuları, insan və zaman haqqında düşüncələri öz əksini tapıb. 1990-cı illərdə yazdığı "Oddan keçənlər", "İnsan səviyyəsi", "Adi həqiqətlər" və s. poemalarında Azərbaycanda gedən azadlıq mübarizəsindən bəhs olunur. Şairin "Qağayı", "Hamıya borcluyam", "Dənizdə ay çiməndə", "Od gəlini", "Günlərin bir günü", "Gül ömrü", "İnsan xasiyyəti", "Ömürdən səhifələr", "Mavi dünyanın adamları" və s. çap əsərləri var. Şairin "Anacan, dostum evlənir", "Könlüm", "Günay", "Gəl ey səhər", "Gecə yaman uzundur", "Payız gəldi" və s. şeirlərinə yazılan mahnılar indi də dillər əzbəridir. Ədibin əsərlərində səmimiyyət, mənəviyyat, məhəbbət, bütövlükdə bəşəri dəyərlər təbliğ edilir. Şairin fəaliyyəti dövlətimiz tərəfindən yüksək qiymətləndirilərək "Şöhrət", "İstiqlal" ordeni, "Əməkdar incəsənət xadimi" və "Xalq şairi" fəxri adlarına layiq görülüb.
Sonra sərgiyə baxış olub.
Tədbirdə Məmməd Səid Ordubadi adına Naxçıvan Muxtar Respublika Kitabxanasının əməkdaşları və fəal oxucular olmaqla 21 nəfər iştirak edib.
|
|