|
"Hüseyn Həşimli - 60"
|
|
21.8.2025
|
|
21 avqust 2025-ci il tarixdə Məmməd Səid Ordubadi adına Naxçıvan Muxtar Respublika Kitabxanasında Azərbaycan Respublikasının Əməkdar elm xadimi, ədəbiyyatşünas Hüseyn Həşimlinin anadan olmasının 60 illik yubileyi münasibətilə sərgi təşkil edilib.
Sərgidə görkəmli ədəbiyyatşünasın tədqiqat əsərləri, monoqrafiyalar, publisistik məqalələrin toplandığı 14 kitab nümayiş edilir.
Sərgidə nümayiş edilən “Azərbaycan ədəbi mühiti və türk dünyası” kitabında Azərbaycan ədəbi mühitinin türk dünyası konteksində, türk xalqlarının ədəbiyyatları ilə qarşılıqlı əlaqələrinin mövzu, poetika və tipologiya səviyyəsində tədqiqinə həsr olunmuş məqalələr toplanıb. “Azərbaycan dilində lirik poeziyanın inkişaf yolu” adlı dərs vəsaitində XIII əsrdə və XIV yüzilliyin əvvəllərində Azərbaycan dilində yazılmış lirik poeziyanın inkişaf yolu dövrümüzə çatmış nümunələr əsasında nəzərdən keçirilir, İzzəddin Həsənoğlu, Hüman Təbrizi və digər şairlərin doğma dildə şeirlərinin ideya-bədii xüsusiyyətləri və ədəbi təsir dairəsi araşdırılır. “Azərbaycan Xalq Cümhuriyyəti dövründə satirik poeziya” adlı dərs vəsaitində Azərbaycan Xalq Cümhuriyyəti dövründə satirik poeziya əhatəli tədqiqata cəlb olunur, S.Mənsur, S.Mümtaz, C.Cabbarlı, Ə.Müznib, Ə.Qəmküsar, B.Abbaszadə və s. şairlərin həmin mərhələdə yazdığı satirik şeirlərin ideya-bədii xüsusiyyətləri dəyərləndirilir. “Unudulmuş yazıçı Ələkbər Qərib Naxçıvanlı” adlı monoqrafiyada Naxçıvan ədəbi mühitinin tanınmış simalarından olan Ələkbər Qərib Naxçıvanlının ömür yolu, bədii yaradıcılığı, ədəbi-tənqidi və publisistik irsi, tərcüməçilik və naşirlik fəaliyyəti haqqında məlumat verilir. “Hüseyn Cavidin lirikası və Avropa poetik ənənələri” kitabında romantik ədib Hüseyn Cavidin lirikasında Avropa ədəbi ənənələrinə müraciət məsələləri diqqət mərkəzinə çəkilir, novator şairin şeirimizə gətirdiyi yeni qafiyələnmə modelləri, marş, sonet janrlarında yazdığı əsərlər hərtərəfli araşdırılır. “Naxçıvanlı yazıçılar və “Məktəb” jurnalı” adlı monoqrafiyasında Naxçıvan ədəbi mühitinin Hüseyn Cavid, Məmmədəli Sidqi, Əli Səbri Qasımov, Ələkbər Qərib Abbasov kimi yetirmələrinin Bakıda 1911-1920-ci illərdə çıxmış “Məktəb” jurnalı ilə yaradıcılıq əlaqələri araşdırılır.
Sərgidə həmçinin Hüseyn Həşimlinin “Azərbaycan mənsur şeirinin təşəkkülü”, “Bir tərcümənin taleyi”, “Səid Səlmasi”, “Əli Məhsun və “Ədəbiyyata dair” əsəri”, “İzzəddin Həsənoğlunun ədəbi irsi”, “Azərbaycan poeziyasında sonet və terset”, “Avropa lirik janrları və Azərbaycan ədəbiyyatı”, “XX əsr Azərbaycan ədəbiyyatında yeni lirik janrlar” adlı kitabları nümayiş edilir. Sərgi avqust ayının 28-dək nümayiş ediləcək.
|
|