|
"Beynəlxalq Azərbaycan Muğamı Günü"
|
|
22.8.2025
|
|
22 avqust 2025-ci il tarixdə Məmməd Səid Ordubadi adına Naxçıvan Muxtar Respublika Kitabxanasında Beynəlxalq Azərbaycan Muğamı Günü münasibətilə sərgi təşkil edilib.
Sərgidə Azərbaycan və xarici dildə 19 kitab, 1 səsyazısı-CD (albom) nümayiş edilir.
Sərgidə nümayiş edilən F. Şuşinskinin “Azərbaycan xalq musiqiçiləri” adlı kitabında xalq musiqisi və onun tanınmış nümayəndələrindən Hacı Hüsüdən başlamış məşhur xanəndə Xan Şuşinskiyə qədər el sənətkarları haqqında ətraflı məlumat verilir. “Azərbaycan musiqi xəzinəsi” adlı kitabında isə tanınmış muğam ustalarından əlavə oxuculara məlum olmayan neçə-neçə sənətkar haqqında qiymətli məlumatlar toplanıb. F. Əzimlinin “Azərbaycan muğam məktəbi” adlı kitabında ilk dəfə olaraq instrumental muğamlar tam şəkildə nota köçürülüb. R. Zöhrabovun “Muğam” və “Azərbaycan muğamları” adlı kitablarında Azərbaycan xalqının musiqi irsində muğamların yeri, həmçinin bədii qiyməti müəyyənləşdirilir, muğam dəstgahlarının, kiçik həcmli muğamların, zərbi-muğamların səciyyəvi cəhətləri araşdırılır. Z. Səfərovanın “Azərbaycan musiqi elmi” kitabında Azərbaycanın musiqi elminin inkişaf yollarının əsas mərhələləri, nəzəri və estetik problemləri, həmin dövrdə yaşayıb yaradan musiqi alimlərinin həyat və yaradıcılığı öz əksini tapıb. T. Bakıxanovun “Dügah”, “Humayun”, “Nəva”, “Rahab”, “Şahnaz” simfonik muğam kitabları ifaçılar, musiqişünaslar və bəstəkarlar üçün dəyərli töhfədir. Mehriban xanım Əliyevanın rəhbərliyi ilə ərsəyə gələn “Qarabağ Xanəndələri” adlı musiqi albomu Qarabağ muğam ifaçılığı məktəbinin müxtəlif nəsillərinə aid 24 xanəndənin səsyazıları olan CD diskdən və 5 dildə çap olunmuş xanəndələrin həyat və yaradıcılığı ilə bağlı məlumat və fotoları əhatə edir.
Sərgidə, həmçinin “İzahlı muğam lüğəti”, R. Zöhrabovun “Azərbaycan zərbi muğamları”, M. Hacıyevanın “Azərbaycan muğam fəlsəfəsi”, R. İbişovanın “Əbədiyyət notları“, Ə. Məmmədlinin “Azərbaycan muğamları”, T. Bünyadovun “Əsrlərdən gələn səslər”, “Энциклопедия Азербайджанского мугама”, Р.Зохрабов “Азербайджанские теснифы” adlı kitablar nümayiş edilir.
Sərgi avqust ayının 29-dək nümayiş ediləcək.
|
|