|
Xətib Təbrizi - 995
|
|
29.8.2025
|
|
29 avqust 2025-ci il tarixdə Məmməd Səid Ordubadi adına Naxçıvan Muxtar Respublika Kitabxanasında “Kitabxana Günü” ilə əlaqədar şair, mütəfəkkir Xətib Təbrizinin anadan olmasının 995 illik yubileyi münasibətilə tədbir keçirilib.
Tədbiri giriş sözü ilə Məmməd Səid Ordubadi adına Naxçıvan Muxtar Respublika Kitabxanasının elmi işlər üzrə direktor müavini Yeganə Səfərova açaraq qeyd edib ki, Xətib Təbrizi Azərbaycan ədəbiyyatının tanınmış simalarından biri, XI əsrdə yaşayıb-yaratmış ensiklopedik biliyə malik böyük şəxsiyyətdir. Şair şeirlərində paxıllığı, xudpəsəndliyi və haqsızlığı tənqid edib. Onun bədii əsərlərinin az bir qismi dövrümüzə gəlib çatıb.
Məmməd Səid Ordubadi adına Naxçıvan Muxtar Respublika Kitabxanasının Ümumi oxu zalının müdiri Vəsilə Cəfərova “Alim, dilçi, ədəbiyyatşünas – Xətib Təbrizi” və kitabxanaçı Rəqsanə Rzayeva “Xətib Təbrizi yaradıcılığı” adlı mövzularla çıxış edərək bildiriblər ki, gənc yaşlarından ədəbiyyata maraq göstərən Xətib Təbrizi yaradıcılığa şeirlə başlayıb. Suriya və Misirdə dil, ədəbiyyat tarixi, fəlsəfə və ilahiyyat elmlərini öyrənən Xətib Təbrizi 40 il Bağdaddakı “Nizamiyyə” Universitetində dərs deyib, filologiya elmlərinin tədrisinə rəhbərlik edərək universitet kitabxanasının müdiri olub. O, universal, ensiklopedik elm sahəsinə dair tədqiqatları ilə şöhrət qazanıb. XətibTəbrizi şair, mütəfəkkir kimi Yaxın və Orta Şərqdə məşhurlaşıb, ərəb dilli ədəbiyyatın elmi poetikasını yaradıb. Onun yaradıcılığında əsas fəaliyyət sahəsi ədəbiyyatşünaslıqdır. Bundan başqa Xətib Təbrizi Qurana dördcildlik şərhlərin, ədəbi əsərlərin və leksikoqrafiyaya, qrammatikaya, habelə ərəb poetika nəzəriyyəsinə dair bir sıra risalələrin müəllifidir. Şairə "Əbu Təmmam divanının şərhi", "Səqtəzcəndin şərhi", "Həmasə"nin şərhi", "Əl-Müfəddəliyatın şərhi" kimi əsərlər geniş şöhrət qazandırıb. Xətib Təbrizi tədqiqatlarında ədəbiyyat və dil problemləri ilə yanaşı, etnoqrafiya, fəlsəfə, ilahiyyatın müxtəlif məsələlərini araşdırıb. O, xalq həyatını düzgün əks etdirməyi poeziyanın başlıca vəzifəsi sayıb.
Tədbirdə Məmməd Səid Ordubadi adına Naxçıvan Muxtar Respublika Kitabxanasının əməkdaşları və fəal oxucular olmaqla 21 nəfər iştirak edib.
|
|